مجموعة أطباق متنوعة من مطبخ مكرونة

17/02/2010 by MaCaRoNa


بسم الله الرحمن الرحيم

البيتزا

المقادير والطريقة

3 كوب دقيق – 1م ك خميرة فورية – 1 م ك بيكنج بودر – 2 م ك سكر – 3 م ك لبن بودر – 1/4 كوب زيت – 1 كوب ماء دافئ – ملح

1- فى وعاء نضع الدقيق + اللبن + السكر + الملح + البيكنج بودر + الخميرة ونخلط كل المواد الجافة مع بعض

2- ثم نضع الزيت + الماء ونعجن ثم تغطى وتترك فى مكان دافئ لمده ساعة حتى تخمر

الحشو

1- نجهز صلصة البيتزا وهى عبارة عن

بصلة صغيرة مفرومة ناعم توضع فى طاسة مع 2 م ك زيت زيتون ونقلب لحد ماتصفر ثم نضع 2 فص توم مفروم ناعم ونقلب ثم نضع الصلصة والزعتر والملح والفلفل

2- نقطع فلفل مكعبات وطماطم وزيتون يمكن اضافة بسطرمة فراخ سوسيس او اى اضافة تفضليها

3- نحضر الجبنة الموزريلا

بعد ما تخمر العجينة نفردها ونقطعها دواير ونحطها فى صينية مدهونة زيت خفيف ثم نضع الصلصة ثم الحشو ثم الجبنة وتترك لتخمر 1/2 ساعة وتدخل فرن حامى لمدة 10 دقايق حتى تحمر

ملحوظة

تغطى البيتزا بفوطة حتى تظل طرية



ودى نفس العجينة بس اخدت منها قطع مستطيلة لفيت بيها السوسيس وحطيتهم جنب بعض وتترك لتخمر ثم تدخل فرن حامى لمده 10 دقائق او لحد ماتحمر


وايضا دى من نفس العجينة ونفس الحشوة ولكن بطريقة لف مختلفة


الكوكيز

الطريقة والمقادير

احب اشكر صاحبة المقادير والوصفة واسمها امولة

150 جرام دقيق – 85 جرام زبدة – 85 جرام سكر – 100 جرام شوكليت شيبس – بيضة – فانيليا – 1 م ص بيكنج بودر

1- نشغل الفرن على درجة 160

2- نحط الزبدة السايحة ونخلطها مع السكر ثم نضع البيضة ثم الفانيليا ثم الدقيق والبيكنج بودر نحطهم شوية شوية حتى نحصل على عجينة طرية ولزجة نوعا ما

3- انا اضفت على هذه الوصفة والمقادير رشة قرفة + 1م ك عسل اسود ونخلط كل المقادير كويس

4- ثم نضع الشوكليت شيبس ويمكن ان تزودى مقدار الشوكليت شيبس ل 150 جرام

5- يوضع على ورق زبدة وعلى مسافات متباعدة بعد مايكور ويضغط عليه ضغطة خفيفة

6- يدخل الفرن لمدة من 10 الى 15 دقيقة



الكيك الحادق

الطريقة والمقادير

1م ص سكر + 1 م ك خميرة فورية + بيضة + ذرة ملح + 3 م ك لبن بودر + رشة زعتر + شطة + ثوم بودر + بصل بودر تخلط هذه المقادير معا وتترك لمدة 1/4 ساعة لتخمر

بعد ما ترتفع نحط 1 و1/2 كوب دقيق + اقل من 1/2 كوب زيت + 1 م ك بيكنج بودر كل ده مع الخليط السابق يمكن استخدام الخلاط

تترك لترتاح لمدة ساعة حتى تخمر

نبدأ فى تجهيز الحشو

1- نضع بصلة مبشورة فى طاسة بها 1 م ك زيت حت تصفر ثم نضع الطماطم المكعبات ثم المشروم ونخلط وبعد ما تتسبك نضع الزيتون والجبنة الرومى المبشورة يمكن وضع مكعبات فلفل الوان

ملحوظة

يجب ان تكون الخلطة ناشفة وليس بها ماء

2- لما تبرد الحشوة نحطها على الخليط ونقلب ثم توضع فى قالب مبطن وتدخل فرن 180 لمدة نص ساعة او اقل حسب الفرن ويتم اختبارها بعود خلة








وأخيراً الكيك

وهى عبارة عن كيكة عادية تزينيها حسب رغبتك

الطريقة والمقادير

4بيض – 1 ك سكر – 1/2 ك  لبن – 1/2 ك زيت –  4 م ك كاكاو – 1 ك دقيق يمكن زيادة كمية الدقيق حوالى 1/4 كوب حسب نوع الدقيق – 1 م ك بيكنج بودر – فانيليا

1- نخلط البيض + السكر + الفانيليا حتى يكون الخليط كريمى

2- نضع اللبن المضاف اليه الكاكاو ونخلط ثم نضع الزيت

3- نضيف الدقيق ويقلب تقليب خفيف بالملعقة ثم يوضع فى قالب مبطن ويدخل فرن مشغل مسبقا على درجة 180 لمده من 1/2 ساعة حتى 35 دقيقة وتختبر بعد هذه المدة بعود خلة

4- تترك لتبرد ويمكن تقسيمها الى جزئين او تلاته حسب الرغبة وتسقى بالشربات او بماء الكمبوت وتحشى بكريم شانتيه وفواكه

5- يمكن ان تزين من فوق اما بكريم شانتيه او اى طريقة تحبيها وانا عملت صوص شيكولاته للكيك وهو عبارة عن

100 جرام شيكولاته خام + 50 جرام من الزبده يوضع فى حمام مائى حتى الذوبان ثم نضع حوالى 5 م ك كريمة لبانى ونخلط كويس

بعد مايبرد الصوص يوضع على الكيك ويمكن ان تزين او نكتفى بالصوص




ان شاء الله تكون الاطباق عجبتكم وتكون سهلة علشان تجربوها






This entry was posted on Wednesday, February 17th, 2010 at 6:28 PM and is filed under حلويات, معجنات. You can follow any responses to this entry through the RSS 2.0 feed. You can leave a response, or trackback from your own site.

يوجد 14 تعليقات على “مجموعة أطباق متنوعة من مطبخ مكرونة” - يمكن إضافة تعليق

  1. ام جهاد
    February 24th, 2010 at 8:06 PM

    تسلم الايادى والله شويه عليكى الكلمه دى بدور علي كلام تانى مش لاقيه على العموم تسلم الايادى والعيون والذوق الرفيع …وربنا يخليكى ونحن فى انتظار المزيد

    ------------------------------------------------------------------
  2. MaCaRoNa
    February 24th, 2010 at 9:14 PM

    ربنا يخليكى يا ام جهاد على كلامك الجميل
    وانا بجد اللى مش لاقيه كلام ارد بيه عليكى وعلى ذوقك

    ------------------------------------------------------------------
  3. dodo
    February 25th, 2010 at 8:35 PM

    ما شاء الله كله حلو جدا برافو يا شيماء وانا طبعا اكلت من الانواع كلها جميله جدا ياريت كله يجربها

    ------------------------------------------------------------------
  4. dodo
    February 25th, 2010 at 8:37 PM

    منظر السفره رائع

    ------------------------------------------------------------------
  5. om nor
    February 25th, 2010 at 9:17 PM

    اية الجمال دة بس
    مش عارفة اقولك اية يا مكرونة
    انتى ممتازة
    فى كل حاجة
    بس عارفة البيتزا تحفة اووووووووووووووى
    تسلم ايدك

    ------------------------------------------------------------------
  6. وئام
    April 11th, 2010 at 6:13 PM

    تسلم الايادي
    فنانة ما شاء الله..
    اضفتك عندي بالمفضلة..
    ^_^

    ------------------------------------------------------------------
  7. zizi
    July 28th, 2010 at 11:45 PM

    تسلم ايدك حجات كلها تحفة وخصوصا السوسيس تحفة

    ------------------------------------------------------------------
  8. zizi
    July 28th, 2010 at 11:48 PM

    التارت خرافة بجد يسلم زوقك

    ------------------------------------------------------------------
  9. MaCaRoNa
    August 2nd, 2010 at 11:38 PM

    تسلمى حبيبتى نورتينى

    ------------------------------------------------------------------
  10. MaCaRoNa
    August 2nd, 2010 at 11:39 PM

    تسلمى يا قمر شكراااااااا لمرورك
    واتفضلى كل اللى يعجبك بالهنا والشفا

    ------------------------------------------------------------------
  11. om ahmed2010
    November 8th, 2010 at 7:54 PM

    رووووعه يا مكرونتي
    ايه الحلاوة والطعامه دي
    بس هطلب منك طلب وسؤال
    الطلب : اكتبيلنا مقادير الكوكيز بالكوب
    السؤال : بالنسبه للكيك ( التورته ) ياريت تقوليلي مقاس الصينيه

    ------------------------------------------------------------------
  12. MaCaRoNa
    November 8th, 2010 at 9:36 PM

    انت الاروع ياام احمد
    من بعض ماعندكم ياقمر
    بالنسبة لمقاس الصينية 24
    والمقادير حاضرحنزلهالك حبيبتى

    ------------------------------------------------------------------
  13. MaCaRoNa
    November 8th, 2010 at 9:57 PM

    المقادير
    1\4 2 كوب دقيق (كوبين و ربع كوب)
    1 كوب ذبدة
    1 كوب سكر بودرة
    2 بيضة (بيضتين)
    فانيليا
    1 معلقة صغيرة بيكنج بودر
    250 جرام شيكولاتة قطع او شيكولاتة خام مقطعة صغير او شيكولاتة كابرى او جلاكسى مقطعة قطع صغيرة

    الطريقة
    1- نضرب الذبدة مع السكر البودرة حتى تصبح مثل الكريمة
    2- نضيف البيض و الفانيليا و نكمل ضرب بالمضرب
    3- نضيف الدقيق و البيكنج بودر و نكمل ضرب بالمضرب و ممكن ناخذ جزء من العجينة و نضيف لها كاكاو خام بدون سكر
    4- بتكون العجينة طريقة ممكن نشكلها بالايد على شكل كور او بمعلقة الايس كريم

    بصى يا ام احمد الطريقة دى حلوة لحد ماأدور على مقادير اللى عملاه باكوباية

    ------------------------------------------------------------------
  14. MaCaRoNa
    November 8th, 2010 at 9:59 PM

    150 جرام زبدة لينه(ثلاث ارباع كوب)-1 صفار بيض – فانيليا-كوب ونصف دقيق – 1 ونصف ملعقه صغيرة بيكنج بودر -1 كوب chocolate chips- ربع كوب سكر بنى – ثلث كوب سكر ابيض-ذرة ملح – ملعقه كبيرة كاكاو خام -ربع ملعقه صغيرة قرفه

    ودى كمان طريقة تانية حلوة ومضمونة

    ------------------------------------------------------------------

إضـــافة تعـــليق